Akele Hain Wo Aur Jhunjhla Rahe Hain

akele hain vo aur jhunjhla rahe hain

miri yaad se jang farma rahe hain

ye kaisi hava-e-taraqqi chali hai

diye to diye dil bujhe ja rahe hain

ilahi mire dost hon khairiyat se

ye kyuun ghar men patthar nahin aa rahe hain

bahisht-e-tasavvur ke jalve hain main huun

judai salamat maze aa rahe hain

qayamat ke aane men rindon ko shak tha

jo dekha to vaaiz chale aa rahe hain

baharon men bhi mai se parhez tauba

‘khumar’ aap kafir hue ja rahe hain

Leave a Comment