Ab Ke Qimar-E-Ishq Bhi Thahra Ek Hunar Danai Ka

ab ke qimar-e-ishq bhi Thahra ek hunar dana.i ka

shauq bhi tha is khel ka ham ko ḳhauf bhi tha rusva.i ka

bas vahi ik be-kaif udasi bas vahi banjar sannaTa

sau sau rang milan ke dekhe ek hi rang juda.i ka

pyaar ki jang men yaaro ham ne do hi ḳhadshe dekhe hain

pahle-pahal tha ḳhauf-e-asiri ab hai ḳhauf riha.i ka

apni hava men yuun phirta tha jaise bagula sahra men

ham ne jab dekha to ajab tha haal tire sauda.i ka

ajnabi chehre takte rahna shahr ki chalti rahon par

apni samajh men ab aaya hai ye pahlu tanha.i ka

ankhen apni band thiin jab tak haal pe apne ro.e bahut

aankh khuli to dekha haal yahi tha saari ḳhuda.i ka

dil ki zamin par bo.e the ‘baqar’ biij jo dard juda.i ke

chaliye ab vo fasl khaḌi hai vaqt aaya hai kaTa.i ka