Bahut Qarine Ki Zindagi Thi Ajab Qayamat Mein Aa Basa Hun

Azm Bahzad

bahut qarine ki zindagi thi ajab qayamat men aa basa huun

sukun ki sub.h chahta tha so sham-e-vahshat men aa basa huun

main apni angusht kaTta tha ki biich men niind aa na jaa.e

agarche sab ḳhvab ka safar tha magar haqiqat men aa basa huun

visal-e-farda ki justuju men nashat-e-imroz ghaT raha hai

ye kis talab men ghira hua huun ye kis aziyyat men aa basa huun

yahan to be-fursati ke hathon vo pa.emali hui hai meri

ki jis se milne ki aarzu thi usi ki furqat men aa basa huun

kahan ki duniya kahan ki sansen ki sab fareb-e-havas nikla

jaza ki muddat samajh raha tha saza ki mohlat men aa basa huun

saval karne ke hausle se javab dene ke faisle tak

jo vaqfa-e-sabr aa gaya tha usi ki lazzat men aa basa huun

ye un se kahna jo meri chup se hazar baten bana rahe the

main apne sho.ale ko pa chuka huun main apni shiddat men aa basa huun