Ghayas Anjum
ham ne jab chaha koi aag bujhane aa.e
aa.e to log magar dil ko jalane aa.e
kuchh asar hota nahin bazm-e-tarab ka dil par
dard ka giit koi aaj sunane aa.e
raas jab aa na saka shahr-e-ḳhirad ka mahaul
vus.at-e-dasht-o-bayaban men divane aa.e
bhagi jaati hai ye duniya na.i raunaq ki taraf
shahr hai ujḌa hua kaun basane aa.e
aaj tak jin ko nahin rah-e-sadaqat ki ḳhabar
haqq-o-batil ka vahi farq batane aa.e
kyuun kisi ghair pe ilzam main rakhta ‘anjum’
mere apne vo sabhi the jo rulane aa.e
Leave a Reply