Sanjay Mishra Shauq
shikasta chhat men parindon ko jab Thikana mila
main ḳhush hua ki mire ghar ko bhi gharana mila
falak pe uḌte hue bhi nazar zamin pe rahi
mizaj mujh ko muqaddar se ta.irana mila
ham us ke husn-e-suḳhan ki dalil kya denge
vo jitni baar mila ham se barmala na mila
ab aa gaya hai to chup-chap ḳhamushi ko sun
mire sukut men apni koi sada na mila
laḌi si TuuT ke ankhon se gir paḌi ai ‘shauq’
labon se harf ka koi bhi silsila na mila
Leave a Reply