Akhtar Shirani
hamare haath men kab saghar-e-sharab nahin
hamare qadmon pe kis roz mahtab nahin
jahan men ab koi surat pae-savab nahin
vo mai-kade nahin saaqi nahin sharab nahin
shab-e-bahar men zulfon se khelne vaale
tire baghair mujhe arzu-e-khvab nahin
chaman men bulbulen aur anjuman men parvane
jahan men kaun gham-e-ishq se kharab nahin
gham, aah ishq ke gham ka koi nahin mausam
bahar ho ki khizan kab ye iztirab nahin
umid-e-pursish-e-ahval ho to kyunkar ho
salam ka bhi tiri bazm men javab nahin
vatan ka chhed diya kis ne tazkira ‘akhtar’
ki chashm-e-shauq ko phir arzu-e-khvab nahin
Leave a Reply