falak ki chiiz zamin par utaar laa.i ga.i
ye ishq kya tha ki jis men ana ganva.i ga.i
hazar janmon ka bandhan kaha tha us ne jise
ye dosti to faqat do qadam nibha.i ga.i
tire labon se chhalakti rahi sharab magar
ham aise tishna-labon ko nahin pila.i ga.i
na ḳhush-ada hi thi vo aur na dil-ruba thi magar
hamari zid thi so zid men hi vo paTa.i ga.i
main sang-dil to nahin huun ki naqsh daa.im ho
tumhari yaad to ab ho ga.i hai aa.i ga.i
saheliyan thiin ba-zid aur unhen tha pas-e-haya
hamare naam ki mehndi nahin dikha.i ga.i
mira vajud tha uryan badan ke paikar men
hijab ke liye teri qaba sila.i ga.i
tumhare saath miri niind ne bhi hijrat ki
agarche niind ki goli bahut khila.i ga.i
ab iltifat ki ummid mat rakho ‘kashif’
nikah kya hua barson ki ashna.i ga.i
Leave a Reply