Nooh Narvi
daulat hai baḌi chiiz hukumat hai baḌi chiiz
in sab se bashar ke liye izzat hai baḌi chiiz
jab zikr kiya main ne kabhi vasl ka un se
vo kahne lage paak mohabbat hai baḌi chiiz
bas aap ke nazdik to ai hazrat-e-va.iz
aayat hai baḌi chiiz rivayat hai baḌi chiiz
puuri na agar ho to koi chiiz nahin hai
nikle jo mire dil se to hasrat hai baḌi chiiz
ai ‘nuh’ na tum us ko hasinon men ganvao
ye ḳhuub samajh lo ki riyasat hai baḌi chiiz
Leave a Reply