be-ma.ani la-hasil raddi sheron ka hai jaal udhar
jo chizen be-kar hain pyare un chizon ko Daal udhar
kuchh tajvizen paas karega vaqt ke hathon ye ijlas
majbur-o-nadar idhar hain asuda ḳhush-hal udhar
biich men haa.il kar de koi kaash takalluf ki divar
udhar hai rela gul-chinon ka aur gulon men kaal idhar
ḳhun-e-tamanna ki surḳhi se dil ki hikayat hai rangin
daman ki taqdir idhar hai gulshan ka iqbal udhar
un ki bazm se aane vaale thaam ke dil farmate hain
jaane vaalo udhar na jaao jurm hai arz-e-hal udhar
jalsa-e-gham ki tayyari men udhar hain jiite ji masruf
paida.ish ka jashn manaya yaron ne har saal udhar
ik muddat se dekh raha huun hota hai har baar yahi
idhar ‘saba’ ne ḳhvab sajaya vaqt ne badli chaal udhar
Leave a Reply