Parveen Shakir
badban khulne se pahle ka ishara dekhna
main samundar dekhti huun tum kinara dekhna
yuun bichhadna bhi bahut asan na tha us se magar
jaate jaate us ka vo mud kar dobara dekhna
kis shabahat ko liye aaya hai darvaze pe chand
ai shab-e-hijran zara apna sitara dekhna
kya qayamat hai ki jin ke naam par paspa hue
un hi logon ko muqabil men saf-ara dekhna
jab banam-e-dil gavahi sar ki mangi jaegi
khuun men duuba hua parcham hamara dekhna
jitne men bhi jahan ji ka ziyan pahle se hai
aisi baazi harne men kya khasara dekhna
aaine ki aankh hi kuchh kam na thi mere liye
jaane ab kya kya dikhaega tumhara dekhna
ek musht-e-khak aur vo bhi hava ki zad men hai
zindagi ki bebasi ka istiara dekhna
Leave a Reply