azmat-e-fan ke parastar hain ham
ye ḳhata hai to ḳhata-var hain ham
johd ki dhuup hai iman apna
munkir-e-saya-e-divar hain ham
jante hain tire gham ki qimat
mante hain ki gunahgar hain ham
us ko chaha tha kabhi ḳhud ki tarah
aaj ḳhud apne talabgar hain ham
ahl-e-duniya se shikayat na rahi
vo bhi kahte hain ziyan-kar hain ham
koi manzil hai na jaada ‘mohsin’
surat-e-gardish-e-parkar hain ham
Leave a Reply