ḳhud se niklun to alag ek saman hota hai
aur gahra.i men utrun to dhuan hota hai
itni pechidgi nikli hai yahan hone men
ab koi chiiz na hone ka guman hota hai
ik tasalsul ki rivayat hai hava se mansub
ḳhaak par us ka amiin ab-e-ravan hota hai
sab savalon ke javab ek se ho sakte hain
ho to sakte hain magar aisa kahan hota hai
saath rah kar bhi ye ik dusre se Darte hain
ek basti men alag sab ka makan hota hai
kya ajab raaz hai hota hai vo ḳhamosh ‘malal’
jis pe hone ka koi raaz ayaan hota hai
Leave a Reply