Majid Ul Baqri
ansuon ki ek chadar tan ga.i hai
dekhne men raushni hi raushni hai
sukhe patte sab ikaTThe ho ga.e hain
raste men ek divar aa ga.i hai
gham ka rela zehn hi ko le uḌa hai
sochiye to andhiyon ki kya kami hai
chullu-chullu raushni ko pi raha huun
mauj-e-dariya qatra qatra chandni hai
raat men dhunka hua suraj paḌa tha
din men ‘majid’ dhuup kaali ho ga.i hai
Leave a Reply