Khawer Eijaz
zamin ke haath men huun aur na asman ke hi
paḌa hua huun main aisi jagah pe jaan ke hi
na ham se kahte hain kuchh aur na ham se sunte hain
ye aadmi hain kisi dusre jahan ke hi
tire jahan ke jhagḌon men haath kyuun Dalon
mujhe bahut hain bakheḌe mire makan ke hi
suna rahi hai jise joḌ joḌ kar duniya
tamam TukḌe hain vo meri dastan ke hi
tire falak pe hai kya aur bhi koi raushan
chamak rahe hain sitare to ḳhak-dan ke hi
hamen jo maan rahe hain zaban se bhi apni
is intiha pe vo aa.e hain dil se maan ke hi
kisi se koi nahin baz-purs duniya men
zamana pichhe paḌa hai hamari jaan ke hi
to kya tujhe bhi koi aur kaam baaqi nahin
jo ham pe rahne lage din ye imtihan ke hi
magar ye qatl ki sazish kahan se aa nikli
vo ḳhat vo log to the mere ḳhandan ke hi
so band karna paḌa mujh ko karobar-e-hayat
vo aa ke baiTh gaya samne dukan ke hi
Leave a Reply