yuun lab se apne nikle hai ab bar-bar aah
karta hai jis tarah ki dil-e-be-qarar aah
ham iid ke bhi din rahe ummid-var aah
ho ji men apne iid ki farhat se shad-kam
khuban se apne apne liye sab ne dil ke kaam
dil khol khol sab mile aapas men khaas o aam
aghosh-e-khalq gul-badanon se bhare tamam
khali raha par ek hamara kanar aah
kya puchhte ho shokh se milne ki ab khabar
kitna hi justuju men phire ham idhar idhar
lekin mila na ham se vo ayyar fitnagar
milna to ik taraf hai azizo ki bhar-nazar
poshak ki bhi ham ne na dekhi bahar aah
rakhte the ham umiid ye dil men ki iid ko
kya kya gale lagavenge dil-bar ko shaad ho
so tu vo aaj bhi na mila shokh-e-hila-ju
thi aas iid ki so gai vo bhi dosto
ab dekhen kya kare dil-e-ummid-var aah
us sang-dil ki ham ne gharaz jab se chaah ki
dekha na apne dil ko kabhi ek dam khushi
kuchh ab hi us ki jaur-o-taaddi nahin nai
har iid men hamen to sada yaas hi rahi
kafir kabhi na ham se hua ham-kanar aah
iqrar ham se tha kai din aage iid se
yaani ki id-gah ko javenge tum ko le
akhir ko ham ko chhod gae saath aur ke
ham haath malte rah gae aur raah dekhte
kya kya gharaz saha sitam-e-intizar aah
kyuun kar lagen na dil men mire hasraton ke tiir
din iid ke bhi mujh se hua vo kanara-gir
is dard ko vo samjhe jo ho ishq ka asiir
jis iid men ki yaar se milna na ho ‘nazir’
us ke upar to haif hai aur sad-hazar aah
Leave a Reply