jism-o-jan rakhta huun lekin ye havala kuchh nahin
aap ki nisbat hai sab kuchh mera apna kuchh nahin
ishq jis kuche men rahta hai vo kucha hai bahisht
aql jis duniya men rahti hai vo duniya kuchh nahin
kitne sada-lauh the agle zamane ke vo log
kah diya jo dil men aaya dil men rakkha kuchh nahin
dekhne vaala koi hota to ham bhi khelte
the tamashe saikḌon lekin dikhaya kuchh nahin
aa ke jo sairab karti hai zamin-e-ḳhushk ko
asl men hai mauj-e-dariya shor-e-dariya kuchh nahin
is taraf hai meri vahshat us taraf tera jamal
vo haqiqat da.imi hai ye tamasha kuchh nahin
jaane kis ki justuju men thi hayat-e-muḳhtasar
umr-bhar bhaga kiye aur haath aaya kuchh nahin
ye hasin manzar ye bahr-o-bar ye sab mah-o-nujum
teri qudrat ka karishma hain kisi ka kuchh nahin
pesh karna hai to us ko pesh kiije dil ‘ziya’
yaar ki nazron men duniya ka asasa kuchh nahin
Leave a Reply