hamare sanihe ham ko suna rahe kyuun ho
tum itna bojh bhi dil par utha rahe kyuun ho
tumhari chhanv men baithe utha diya tum ne
phir ab pukar ke vapas bula rahe kyuun ho
jo baat sab se chhupai thi umr bhar ham ne
vo baat saare jahan ko bata rahe kyuun ho
jab ek pal bhi guzarna muhal hota hai
phir itni der bhi ham se juda rahe kyuun ho
tumhari aankh men aansu dikhai dete hain
tum itni zor se hans ke chhupa rahe kyuun ho
jo kar liya hai judai ka faisla tum ne
to ye fuzul bahane bana rahe kyuun ho
na jaane kis liye ankhon men aa gae aansu
zara si baat ko itna badha rahe kyuun ho
Leave a Reply