tumhin batao vo kaun hai jo har ek lamha sata raha hai
na niind raton ko aa rahi hai na chain din ko hi aa raha hai
ye ashk daman bhigo rahe hain ye ankhen suuji hui hain meri
main ek jalve ki us ke talib magar vo parde gira raha hai
tavaf-e-kaaba ko dekh to le tadap raha hai vajud mera
na paanv ab mere uth rahe hain na samne ghar vo aa raha hai
main ek majbur na-tavan si zaiif bandi huun us se talib
tamasha chup-chap dekhta hai kahan taras mujh pe kha raha hai
tujhe usi ki qasam hai maula hai tujh ko mahbub do jahan men
vo apne jalve dikha de mujh ko jo tu nazar se chhupa raha hai
har ek tadbir be-asar hai na ji rahi huun na mar rahi huun
junun-e-ishq-e-khuda hi logo ye haal mera bana raha hai
Leave a Reply