Bas Najat-E-Zindagi To Ishq-E-Ruhani Mein Hai

Aleena Itrat

bas najat-e-zindagi to ishq-e-ruhani men hai

ye saza-e-maut sun kar jism hairani men hai

ret par phaila hua hai khvab jaisa ik sarab

khushk ankhon ka sukun sahra ke is paani men hai

iztirabi kaifiyat hi is zamin ka hai nasib

har ghadi gardish men hai har dam pareshani men hai

kuchh ghubar ankhon tak aaya raaz ham par tab khula

qafila ab bhi koi is dil ki virani men hai

phir kisi tufan ki aamad ka andesha hua

phir qayamat si bapa dariya ki tughyani men hai

yunhi asani se jiine ka irada kar liya

ye na dekha kitni mushkil aisi asani men hai

is qadar auraq-e-mazi par chadha gard-o-ghubar

shayad ab in ki jagah bahte hue paani men hai

apni mitti se ‘alina’ ruuh ki ulfat to dekh

muztarib hai ye bahut gar tu pareshani men hai