Idris Babar
aa jaa.e vo milne to mujhe id-mubarak
mat aa.e ba-har-hal use id-mubarak
aisa ho sab insan hon ḳhush itne ki har roz
ik dusre se kahta phire id-e-mubarak
haan mujh se jise jis se mujhe jo bhi gila ho
abad rahe shaad rahe id-e-mubarak
tanha.i si tanha.i ki divar bhi shashdar
ab khul ke kahe ya na kahe id-e-mubarak
sargoshi ne patthar ko sabaq yaad dilaya
paani ne likha a.ine pe id-e-mubarak
tum jo mire sheron ke muḳhatib the na hoge
aḳhir men tumhen sirf tumhe id-mubarak
Leave a Reply