shikast-e-dil ka fasana suna ke dekhunga
main zarf-e-husn ko bhi aazma ke dekhunga
ajab nahin ki isi tarah naam rah jaa.e
tumhari raah men ḳhud ko miTa ke dekhunga
na jaane kyon nahin badle abhi mire halat
sharik-e-hal ab un ko bana ke dekhunga
suna ye hai ki har ik shai men hai tira jalva
main ab hijab-e-nazar ko uTha ke dekhunga
hansi ye kyon tire honTon pe ab nahin aati
ḳhata muaaf tujhe gudguda ke dekhunga
sharab ko na kahenge ye us ke ba.ad haram
janab-e-shaiḳh ko ik din pila ke dekhunga
malal hi to hai ai ‘soz’ aarzu ka malal
main arzuon ki sham.en bujha ke dekhunga
Leave a Reply