Prem Kumar Nazar
ghaḌi ghaḌi na mujhe puchh ek taaza saval
udaas raat ke siine pe aur bojh na Daal
khile hain phuul suḳhan ke jali hai sham-e-ḳhayal
qafas men jhank ke dekho qafas-zadon ka kamal
usi ke zikr se ham shahr men hue bad-nam
vo ek shaḳhs ki jis se hamari bol na chaal
tire vajud pe chha kar tiri nazar se gire
hamin ne raaj kiya tha hamin hue kangal
bichhaḌ gaya na vo aḳhir adhuri baat liye
main us se kahta raha roz roz baat na Taal
sitamgari ki na.i rasm DhunD li us ne
hamare samne deta hai dusron ki misal
kabhi jo baiTh ga.e ja ke do ghaḌi us paas
‘nazar’-ji! dhul gaya barson ka ji se huzn-o-malal
Leave a Reply