hijr men nashad duniya se dil-e-muztar gaya
aaj apne saath ka ik marne vaala mar gaya
sunne vaale khuub roe mere hal-e-zar par
yuun hi apni umr ka paimana akhir bhar gaya
bazu-e-qatil thakae sakht-jani ne miri
barha is haath se us haath men khanjar gaya
ham vahi gulshan vahi mahfil vahi saman vahi
ek saaqi kya gaya lutf-e-mai-o-saghar gaya
ho gai ghairon ko bhi nakam marne ki havas
main kisi par jaan de kar kaam apna kar gaya
ruh-parvar hai nigah-e-naz qatil ka asar
jis ko dekha ji utha jis ko na dekha mar gaya
main kabhi roya to vo bole Duboya nam-e-ishq
aur agar aansu pi liye to dil men dariya bhar gaya
aisi hi ghaflat rahi gar mere hal-e-zar par
ek din ahbab sun lenge ‘nazar’ bhi mar gaya