Javed Akhtar
misal is ki kahan hai koi zamane men
ki saare khone ke gham paa.e ham ne paane men
vo shakl pighli to har shai men Dhal ga.i jaise
ajiib baat hui hai use bhulane men
jo muntazir na mila vo to ham hain sharminda
ki ham ne der laga di palaT ke aane men
latif tha vo taḳhayyul se ḳhvab se nazuk
ganva diya use ham ne hi azmane men
samajh liya tha kabhi ik sarab ko dariya
par ik sukun tha ham ko fareb khane men
jhuka daraḳht hava se to andhiyon ne kaha
ziyada farq nahin jhukne TuuT jaane men
Leave a Reply