Bharat Bhushan Pant
kahin jaise main koi chiiz rakh kar bhuul jaata huun
pahan leta huun jab dastar to sar bhuul jaata huun
vagarna to mujhe sab yaad rahta hai siva is ke
kahan huun kaun huun kyuun huun main akasr bhuul jaata huun
mire is haal se gumrah ho jaate hain rahbar bhi
main akasr raste men apna hi ghar bhuul jaata huun
dikhata phir raha huun sab ko apne zaḳhm-e-sar lekin
mire hathon men bhi hai ek patthar bhuul jaata huun
nikal jaata huun ḳhud apne hisar-e-zat se bahar
main akasr paanv phailane men chadar bhuul jaata huun
kabhi jab sochne lagta huun pas-e-manzar ke baare men
to mere samne ho koi manzar bhuul jaata huun
kabhi to itna baḌh jaati hai meri pyaas ki shiddat
mire charon taraf hai ik samundar bhuul jaata huun
Leave a Reply