Maza Visal Ka Kya Gar Firaq-E-Yar Na Ho

Imam Bakhsh Nasikh

maza visal ka kya gar firaq-e-yar na ho

nahin hai nashe ki kuchh qadr agar khumar na ho

na roe ta koi ashiq ye hukm hai us ka

ki shama bhi miri mahfil men ashk-bar na ho

jo hichki aai to khush main hua ki maut aai

kisi ko yaar ka itna bhi intizar na ho

zaqan hai seb to unnab hai lab-e-shirin

nahin hai sarv vo khush-qad jo meva-dar na ho

vo huun main morid-e-nafrat ki darkinar hai yaar

pae fishar kabhi gor ham-kanar na ho

na aae kunj-e-lahad men bhi mujh ko khvab-e-adam

agar sirhane koi khisht-e-ku-e-yar na ho

ba-rang-e-husn-e-butan hai dil-e-shagufta mira

jo is chaman men khizan ho to phir bahar na ho

gai hai kaisi zamane se rasm-e-sar-garmi

ajab nahin hai jo patthar men bhi sharar na ho

na hansne se kabhi hamraz posh vaqif hon

ba-rang-e-ghuncha jigar jab talak figar na ho

tiri mizha ki jo tashbih us se tark karen

kisi ke tiir se koi kabhi figar na ho

dam-e-akhir to kar len nazara ji bhar ke

ilahi khanjar-e-saffak ab-dar na ho

yahi hai qulzum-e-gham men miri dua yarab

qayam is men koi bhi habab-dar na ho

vo subh sina-e-sad-chak men hai dagh-e-junun

ki jis se dida-e-khurshed bhi do-char na ho

havas uruuj ki le jaaen gar ye duniya se

kabhi buland hava se koi ghubar na ho

kamal-e-surat-e-be-dard se tanaffur hai

na dekhen ham kabhi us gul ko jis men khaar na ho

hazaron gor ki raten hain katni ‘nasikh’

abhi to roz-e-siyah men tu be-qarar na ho