Iqbal Sajid
ghaar se sang haTaya to vo ḳhali nikla
kisi qaidi ka na kirdar misali nikla
chaḌhte suraj ne har ik haath men kashkol diya
sub.h hote hi har ik ghar se savali nikla
sab ki shaklon men tiri shakl nazar aa.i mujhe
qur.a-e-fal mire naam pe gaali nikla
raas aa.e mujhe murjhate hue zard gulab
gham ka partav mire chehre ki bahali nikla
kaT gaya jism magar saa.e to mahfuz rahe
mera shiraza bikhar kar bhi misali nikla
raat jab guzri to phir sub.h hina-rang hui
asman jaagi hui aankh ki laali nikla
raat mujh se bhi to har ghar ke dar-o-bam saje
chand ki tarah mira aks ḳhayali nikla
taḳht ḳhali hi raha dil ka hamesha ‘sajid’
is riyasat ka to koi bhi na vaali nikla
Leave a Reply