Faizul Amin Faiz
kisi aaseb ka saaya hai is par log kahte hain
paḌa rahta hai vo hujre ke andar log kahte hain
miri basti men ik buḌhiya hai jo sach-much ki Daa.in hai
vo kha jaati hai bachchon ko pakaḌ kar log kahte hain
har ik rishta yahan qaa.em hai bas matlab parasti par
zamane men yahi raa.ij hai culture log kahte hain
muazziz shaḳhsiyat hai shahr ka ab namvar ghunda
ki ban baiTha hai vo parTi ka leader log kahte hain
sabaq leta hai jo bhi ḳhamiyon se apne maazi ki
vahi jaata hai mustaqbil men uupar log kahte hain
ta.alluq hai mira bas dosti ki had talak us se
ghalat baten hi lekin kyon barabar log kahte hain
shikasta naav le kar ‘faiz’ nikle ho samundar men
tumhara Duub jaana hai muqaddar log kahte hain
Leave a Reply