Poet
kitni muztar thi shab sitaron men
os Dhalti rahi shararon men
patte patte ki ruuh jal uTThi
kaisi sozish thi shaḳh-saron men
aao jashn-e-ḳhizan mana.en ham
ajnabiyyat si hai baharon men
chashm-e-mazi ke ḳhushk aansu hain
zarre uḌte hain jo ghubaron men
kaif-e-gham se jo ho ga.e vaqif
the fasurda vo ghamgusaron men
naav shayad kisi ki Duub ga.i
ek halchal si hai kinaron men
phuul ban kar jo dil men rahti hai
‘baḳht’ kaisi ḳhalish hai ḳharon men
Leave a Reply