Meer Asar
kabhu ham se bhi vafa kijiyega
ya yahi jaur-o-jafa kijiyega
dekhen dushnam kahan tak doge
dam men sau baar dua kijiyega
nazar aata hai girah zulf se khol
har taraf fitna bapa kijiyega
jan-o-dil se bhi guzar ja.enge
agar aisa hi ḳhafa kijiyega
ki hai bande ke liye ye be-dad
rahm Tuk bahr-e-ḳhuda kijiyega
ishq ke sadqe uThata tha dil
ab to vo bhi nahin kya kijiyega
ab to Tuk mera kaha kijiye phir
chahiyega so kaha kijiyega
go use ahl-e-vafa se hai ḳhilaf
ab ‘asar’ tu bhi vafa kijiyega
Leave a Reply