bahār-e-zīst kī mahrūmiyāñ are tauba
dil-e-shagufta kī nākāmiyāñ are tauba
visāl-e-yār kī hasrat are ma.āz-allāh
firāq-o-shauq kī betābiyāñ are tauba
payām-e-dāvat-e-mai nīm-bāz āñkhoñ se
nigāh-e-nāz kī rañgīniyāñ are tauba
ḳhudā ne ishq ko majbūriyoñ kā ġham de kar
likhīñ nasīb meñ barbādiyāñ are tauba
hamārī aañkh se aañsū bhī shams’ bah na sake
dil-e-ġharīb kī majbūriyāñ are tauba