use bhula ke bhi yadon ke silsile na ga.e
dil-e-tabah tire us se rabte na ga.e
kitab-e-zist ke unvan badal ga.e lekin
nisab-e-jan se kabhi us ke tazkire na ga.e
mujhe to apni hi sada-dili ne luuTa hai
ki mere dil se muravvat ke hausle na ga.e
main chand aur sitaron ke giit gaata raha
mire hi ghar se andheron ke qafile na ga.e
‘ra.is’ jur.at-e-iz.har mera virsa hai
qaside mujh se kisi shaah ke likhe na ga.e
Leave a Reply