chahat ke ab ifsha-kun-e-asrar to ham hain
kyuun dil se jhagadte ho gunahgar to ham hain
ru aine ko dete ho bar-aks hamare
aina rakho talib-e-didar to ham hain
gulshan men ajab jaate ho kar husn ki tazin
is jins-e-dil-ara ke kharidar to ham hain
kya kabk ko dikhlate ho andaz-e-khiram aah
hasrat-zada-e-shokhi-e-raftar to ham hain
ki chashm su-e-nargis-e-bimar to phir kya
is ain inayat ke saza-var to ham hain
dil de ke dil-azar ko kya shikva-e-bedad
gar sochiye apne liye azar to ham hain
jis din se phanse dekhi na phir shakl-e-rihai
kya kahiye ‘nazir’ aise giraftar to ham hain