Poet
us ki chashm-e-karam thi hayat-afrin ḳhushk patton pe jaise nikhar aa gaya
aarzu ke shagufe mahakne lage dil ki be-chainiyon ko qarar aa gaya
dasht-e-ghurbat men bhi zanu-e-dost par meri tanha.i ko ye ta.assur hua
bhula-bhaTka hua ik musafir koi yak-ba-yak jaise apne dayar aa gaya
umr-bhar fikr-e-duniya men ghaltan rahe maare maare phire muft rusva hue
zindagi daf.atan zindagi ban ga.i chaar ankhen huiin dil men pyaar aa gaya
bankpan un ka mash.hur tha meri divangi par hamesha hanse
lekin ankhon se aansu chhalakne lage samne jab hamara mazar aa gaya
janta huun kudurat buri chiiz hai aap se dushmani ki tavaqqo na thi
duur hona bahut is ka dushvar hai dil ke a.ine men jab ghubar aa gaya
zaḳhm bharne lage dard tham sa gaya ik sahara mila dil ko Dharas bandhi
us ke qaul-o-qasam men bhi ik baat thi jo bhi us ne kaha e’tibar aa gaya
Leave a Reply