abas dhunda kiye ham na-khudaon ko safinon men
vo the asuda-e-sahil mile sahil-nashinon men
vo auron ke buton ko todne valon ko dekho to
chhupae phirte hain apne buton ko astinon men
hamari bekasi aur na-tavani ka khuda hafiz
ki talvaren hain pinhan rahbaron ki astinon men
chhalak jaati hai ashk-e-garm ban kar meri ankhon se
thaharti hi nahin sahba-e-dard in abginon men
mire ashar hain aina-e-soz-e-darun ‘bazmi’
jhalakta hai mira khun-e-jigar in abginon men
Leave a Reply