ja-ba-ja aag bicha.i thi kabhi
apne bas men bhi ḳhuda.i thi kabhi
mere a.ine men ḳhud mere siva
koi surat nazar aa.i thi kabhi
dushmanon se bhi tha yarana mira
doston se bhi laḌa.i thi kabhi
rang chubhte hain jo ab ankhon men
apni tasvir bana.i thi kabhi
jab se hain apne para.e bezar
rasm duniya ki uTha.i thi kabhi
ham ne bhi dasht ko mahkaya hai
ham ne bhi ḳhaak uḌaa.i thi kabhi
khod kar zer-e-zamin kuchh na mila
apni shamshir chhupa.i thi kabhi
ab dahakti hai dobara ‘hamdam’
aag siine men daba.i thi kabhi
Leave a Reply