vo sar se paanv tak hai ghazab se bhara hua
main bhi huun aaj josh-e-talab se bhara hua
shorish mire dimagh men bhi koi kam nahin
ye shahr bhi hai shor-o-shaghab se bhara hua
haan ai hava-e-hijr hamen kuchh khabar nahin
ye shisha-e-nashat hai jab se bhara hua
milta hai aadmi hi mujhe har maqam par
aur main huun aadmi ki talab se bhara hua
takrao ja ke sub.h ke saghar se ‘aftab’
dil ka ye jaam vaada-e-shab se bhara hua
Leave a Reply