Na Ho Jis Pe Bharosa Us Se Hum Yari Nahin Rakhte

na ho jis pe bharosa us se ham yaari nahin rakhte

ham apne ashiyan ke paas chingari nahin rakhte

faqat nam-e-mohabbat par hukumat kar nahin sakte

jo dushman se kabhi ladne ki tayyari nahin rakhte

kharidaron men rah kar zindagi vo bik bhi jaate hain

tire bazar men jo log hushyari nahin rakhte

banao ghar na mitti ke lab-e-sahil ai nadanon

samundar to kinaron se vafadari nahin rakhte

ana ko sakhti-e-halat aksar tod deti hai

isi Dar se kabhi fitrat men khuddari nahin rakhte

dar-o-divar se un ke bhala kya aaegi khushbu

jo ghar ke sahn men phulon ki ik kyari nahin rakhte

faqat lafzon se ham ‘dana’ hunar ki daad lete hain

qalam vaale kabhi shauq-e-adakari nahin rakhte

Leave a Comment