munjamid aḳhir hai kyuun ta-hadd-e-manzar phail ja
chaar janib ai mire ḳhuun ke samundar phail ja
meri avara-mizaji ka rakha tu ne bharam
ai ghubar-e-dasht aa siine ke andar phail ja
aa tujhe apni nazar se bhi rakhun mahfuz main
shauq se mujh men sama andar hi andar phail ja
tazkaron ka oḌh jaama ai miri zinda-dili
har na.e qasbe men ja basti men ghar ghar phail ja
ah-o-zari chhoḌ apni zaat se bahar nikal
qahqahe ki guunj ban kar asman par phail ja
Leave a Reply