na.i tahzib se bachchon ko bacha.un kaise
ḳhud to bigḌa huun zamane ko bana.un kaise
vo na dekhe meri janib to nahin us ki ḳhata
main andhere men paḌa huun nazar aa.uun kaise
mere angan men to aa.i hi nahin mauj-e-bahar
koi phulon se bhara giit suna.un kaise
chahta to huun ki dekhun pas-e-parda kya hai
dastaras jis pe na ho us ko uTha.un kaise
par nikalte hi koi us ko katar deta hai
apne bachchon ko fazaon men uḌa.un kaise
vaqt mahdud diya kaam diya la-mahdud
zindagi bol tira qarz chuka.un kaise
jism par choT lagi ho to dikha.un ‘mahir’
dil pe jo choT lagi hai vo dikha.un kaise
Leave a Reply