Ye to Nahin Ki Tum Se Mohabbat Nahin Mujhe

Ehsan Danish

ye to nahin ki tum se mohabbat nahin mujhe

itna zarur hai ki shikayat nahin mujhe

main huun ki ishtiyaq men sar-ta-qadam nazar

vo hain ki ik nazar ki ijazat nahin mujhe

azadi-e-gunah ki hasrat ke saath saath

azadi-e-ḳhayal ki jur.at nahin mujhe

dubhar hai garche jaur-e-azizan se zindagi

lekin ḳhuda-gavah shikayat nahin mujhe

jis ka gurez shart ho taqrib-e-did men

is hosh is nazar ki zarurat nahin mujhe

jo kuchh guzar rahi hai ghanimat hai ham-nashin

ab zindagi pe ghaur ki fursat nahin mujhe

main kyuun kisi ke ahd-e-vafa ka yaqin karun

itni shadid gham ki zarurat nahin mujhe

sajde mire ḳhayal-e-jaza se hain mavara

maqsud bandagi se tijarat nahin mujhe

main aur de sakun na tire gham ko zindagi

aisi to zindagi se mohabbat nahin mujhe

‘ehsan’ kaun mujh se siva hai mira adu

apne siva kisi se shikayat nahin mujhe