Munh Na Dhanko Ab to Surat Dekh Li

Poet

munh na Dhanko ab to surat dekh li

dekh li ai hur-e-tal.at dekh li

shakl badli aur surat ho ga.i

ik nazar jis ne vo surat dekh li

ek but sajda nahin karta tujhe

bas ḳhudaya teri qudrat dekh li

hai ayaan hal-e-sag-e-as.hab-e-kahf

janvar ki adamiyyat dekh li

chaar din bhi to na tum se nibh saki

aap ki sahab-salamat dekh li

jante the ham na iiza hijr ki

vo bhi sahib ki badaulat dekh li

ghurte hain ab nigah-e-qahr se

chaar din chashm-e-inayat dekh li

kyuun ajal ab zahr pisvata huun main

raah teri ek muddat dekh li

khul ga.i bande pe qadr-o-manzilat

thi jo sahib ki haqiqat dekh li

ja ke ghar jhuTon na puchhi baat tak

bas tiri jhuTi mohabbat dekh li

us se kah aadat se jo vaqif na ho

dekh li ḳhu teri ḳhaslat dekh li

bahr-e-hasti men faqat misl-e-habab

hai mujhe ik dam ki mohlat dekh li

aap hairan hoga apne husn ka

a.ine men gar vo surat dekh li

chandni raton men chillata phira

chand si jis ne vo surat dekh li

phir vahi hai boriya aur apna faqr

chaar din ki jah-o-hashmat dekh li

kyuun churata hai vo kafir mujh se aankh

kya nigah-e-chashm-e-hasrat dekh li

yaad aaya ‘rind’ vo paiman-shikan

gar kahin baham mohabbat dekh li