dekh kar dil ko pech-o-tab ke biich
aa paḌa muft main azaab ke biich
kaun rahta hai tere gham ke siva
is dil-e-ḳhanuman-ḳharab ke biich
tere atish-zadon ne misl-sharar
umr kaaTi hai iztirab ke biich
kya kahun tujh se ab ke main tujh ko
kis tarah dekhta huun ḳhvab ke biich
sham.a fanus men na jab ke chhupe
kab chhupe hai ye munh naqab ke biich
Tuk tabassum ne ki shakar-rezi
baare ab talḳhi-e-itab ke biich
kya kahe vo ki sab huvaida hai
shaan teri tiri kitab ke biich
hai ghulami ‘asar’ ko hazrat-e-‘dard’
ba-dil-o-jan tiri janab ke biich
Leave a Reply