jab arsh pe dam toḌne lagti hain dua.en
deta hai rag-e-jan se mujhe koi sada.en
phir sarmad-o-mansur ka aata hai zamana
ab ahl-e-chaman gul ki jagah daar uga.en
us tishna ki barsat men kya pyaas bujhegi
kashmir ke barfab jise aag laga.en
yuun apni dua sun ke chahak uTThe farishte
jis tarah suḳhan-fahm koi misra.a uTha.en
allah-re vo sarshar gunahgar jo apni
be-saḳhta laghzish pe ḳhuda ko bhi rijha.en
Leave a Reply