nazeer-akbarabadi

Paisa

naqsh yaan jis ke miyan haath laga paise ka

us ne tayyar har ik thath kiya paise ka

ghar bhi pakiza imarat se bana paise ka

khana aram se khane ko mila paise ka

kapda tan ka bhi mila zeb-faza paise ka

jab hua paise ka ai dosto aa kar sanjog

ishraten paas huiin duur hue man ke rog

khaae jab mal-pue duudh dahi mohan-bhog

dil ko anand hue bhaag gae rog aur dhog

aisi khubi hai jahan aana hua paise ka

saath ik dost ke ik din jo main gulshan men gaya

vaan ke sarv-o-suman-o-lala-o-gul ko dekha

puchha us se ki ye hai baagh batao kis ka

us ne tab gul ki tarah hans diya aur mujh se kaha

mehrban mujh se ye tum puchha ho kya paise ka

ye to kya aur jo hain is se bade bagh-o-chaman

hain khile kiyariyon men nargis-o-nasrin-o-suman

hauz favvare hain banglon men bhi parde chalvan

ja-ba-ja qumri-o-bulbul ki sada shor-afgan

vaan bhi dekha to faqat gul hai khila paise ka

vaan koi aaya liye ek murassa pinjda

laal dastar-o-dupatta bhi hara jun-tota

is men ik baithi vo maina ki ho bulbul bhi fida

main ne puchha ye tumhara hai raha vo chupka

nikli minqar se maina ke sada paise ka

vaan se nikla to makan ik nazar aaya aisa

dar-o-divar se chamke tha pada ab-e-tala

siim chune ki jagah us ki tha inton men laga

vah-va kar ke kaha main ne ye hoga kis ka

aql ne jab mujhe chupke se kaha paise ka

rutha ashiq se jo mashuq koi hat ka bhara

aur vo minnat se kisi taur nahin hai manta

khubiyan paise ki ai yaaro kahun main kya kya

dil agar sang se bhi us ka ziyada tha kada

mom-sa ho gaya jab naam suna paise ka

jis ghadi hoti hai ai dosto paise ki numud

har tarah hoti hai khush-vaqti-o-khubi bahbud

khush-dili tazgi aur khurmi karti hai durud

jo khushi chahiye hoti hai vahin aa maujud

dekha yaaro to ye hai aish-o-maza paise ka

paise vaale ne agar baith ke logon men kaha

jaisa chahun to makan vaisa hi Dalun banva

harf-e-takrar kisi ki jo zaban par aaya

us ne banva ke diya jaldi se vaisa hi dikha

us ka ye kaam hai ai dosto ya paise ka

naach aur raag ki bhi khub-si tayyari hai

husn hai naaz hai khubi hai tarah-dari hai

rabt hai pyaar hai aur dosti hai yaari hai

ghaur se dekha to sab aish ki bisyari hai

ruup jis vaqt hua jalva-numa paise ka

daam men daam ke yaaro jo mira dil hai asiir

is liye hoti hai ye meri zaban se taqrir

ji men khush rahta hai aur dil bhi bahut aish-pazir

jis qadar ho saka main ne kiya tahrir ‘nazir’

vasf aage main likhun ta-ba-kuja paise ka

More Poems

Leave a Comment