Dil Pe Jaur-O-Sitam Garan Na Hue

dil pe jaur-o-sitam garan na hue

kaise kah duun vo mehrban na hue

haa.e yadon ke vo nuqush-e-hasin

miT ga.e aur be-nishan na hue

dekhne vaale surat-e-shabnam

surat-e-bahr-e-be-karan na hue

sochta huun vo ashk kya honge

jo abhi zeb-e-dastan na hue

gham to ye hai ki gulsitan men sab

phuul kanTon ke darmiyan na hue

mere sheron se zindagi ke raaz

kuchh hue kuchh abhi ayaan na hue

log kuchh bhi kahen magar ham log

ra.egan ho ke ra.egan na hue

hausla dekh umr-bhar ham log

zindagi tujh se bad-guman na hue

saneha hai ki un ki mahfil men

aaj ‘nashtar’ hi naghma-ḳhvan na hue