us ki tasvir kya lagi hui hai
puure kamre men raushni hui hai
kuchh bhi tartib men nahin tha yahan
us ke aane se behtari hui hai
dil kisi aur ja aḌa hua hai
ruuh kisi aur men phansi hui hai
kaise kah duun main hal-e-dil us se
vo mire samne baḌi hui hai
jiit jaati hai mujh se baton men
baḌe schōl ki paḌhi hui hai
dost to vo bahut purani thi
haan mohabbat na.i na.i hui hai
us ke rone se mausamon men nami
us ke hansne se dhuup si hui hai
mere sheron men aur kuchh na sahi
us ki ḳhushbu rachi-basi hui hai
ab to halat kaafi behtar hain
varna pahle to sha.iri hui hai
aap mat DhunDhiyega kuchh is men
ye ghazal us ke naam ki hui hai
Leave a Reply