mohabbat ke ruḳh-e-raushan se nurani nahin jaati
kisi chashm-e-basirat se bhi tabani nahin jaati
raha ho qurb-e-shahan men sata.ish ke liye be-shak
magar patthar ke but se sift-e-sultani nahin jaati
kisi mushkil se mushkil ka nipaTna sahl hai lekin
kisi surat bhi asani se asani nahin jaati
juda.i men to ho jaati hai kashti aankh ki putli
jo aa jaati hai ankhon men vo tughyani nahin jaati
ḳhirad ne laakh samjhaya ki mujh se dosti kar le
dil-e-nadan ki phir bhi tarz-e-nadani nahin jaati
miri hasrat bhi ik parda-nashin ḳhatun hai sahab
kahin be-parda meri rat-ki-rani nahin jaati
vajah is ki batata hi nahin hai aa.ina apna
ki kyuun ham se hamari shakl pahchani nahin jaati
bahar aati hai sahra men to aurat ke tabassum se
tabassum ke bina to ghar ki virani nahin jaati
likha hai us ki qismat men sada bechain rahna hi
mohabbat men to is dil ki pareshani nahin jaati
dil-e-ashiq ya zulf-e-naznin donon rahen barham
kisi ‘panchhi’ se rakkhi un ki nigarani nahin jaati
Leave a Reply