tum ho bazm-e-aish hai vaan aur sohbat-dariyan
ham hain kunj-e-gham hai yaan aur jaan se bezariyan
tum ko sair-e-bagh-o-gul-gasht-e-chaman ka vaan hai shauq
yaan badan par hain hujum-e-dagh se gul-kariyan
dhyan hai ara.ish-e-zulf-e-pareshan ka tumhen
yaad hain hal-e-pareshan ki miri kuchh ḳhvariyan
tum safa-e-sa.id-o-bazu dikhate ho vahan
ham pe yaan mu-e-badan karte hain nashtar-dariyan
tum ne dikhla.i vahan piiTh aur choTi ki phaban
yaan miri chhati pe hain kaale ne lahren mariyan
nek-o-bad donon se yaan ham ne to ankhen muund liin
tum vahan chitvan ki dikhlate ho jadu-kariyan
yaan ba-rang-e-paikar-e-tasvir ham ḳhamosh hain
guftugu ki tum dikhate ho vahan tarrariyan
qahqahe tum marte ho vaan ba-avaz-e-buland
dushmanon se yaan chhupa kar ham hain karte zariyan
har mariz-e-gham ki jan-baḳhshi ka hai vaan tum ko dhyan
khinch ga.iin yaan tul-e-shiddat se miri bimariyan
iztirab-e-dil se be-parda hua yaan raz-e-ishq
sujhti hain vaan tumhen har baat men tahdariyan
kya kisi se baat kiije bhulte ik dam nahin
un bhalaon se vo baton men tiri ayyariyan
chhin kar baton men dil ko ‘lutf’ se vo but bane
yaad rakhna ghair ki karna vahan dil-dariyan
Leave a Reply