Zaheer Kashmiri
talab asudgi ki arsa-e-duniya men rakhte hain
umid-e-fasl-e-gul hai aur qadam sahra men rakhte hain
hue hain is qadar manus ham paiman-e-farda se
ki ab dil ka safina hijr ke dariya men rakhte hain
bashar ko dekhiye ba-in-hama sahil pe marta hai
hubab apna asasa sail-e-be-parva men rakhte hain
hamare paas koi gardish-e-dauran nahin aati
ham apni umr-e-fani saghar-o-mina men rakhte hain
hamen har gaam par milta raha ezaz-e-mahrumi
vaqar apna bahut ham dida-e-dunia men rakhte hain
umidon ke khanDar mayusiyon ke dam-ba-ḳhud saa.e
baḌi hi raunaqen ham is dil-e-tanha men rakhte hain
hamare daur ke insan ḳhud apni hi zid nikle
talab maazi ki hoti hai qadam farda men rakhte hain
‘zahir’ in dil-zadon ki azmaten dekho ye parvane
charagh-e-ishq raushan vaadi o sahra men rakhte hain
Leave a Reply